Ганзогийн товшлол #7 - 2021/01/08

Сонирхолтой, мэдүүштэй, шинэ санаануудыг хуваалцах зорилготой долоо хоног тутмын "Ганзогийн товшлолд" тавтай морил. (Товшлол = Товших + Товчлох)

Энэ өдрүүдэд жилийн өмнө бичиж байснаа уншиж, 2020 онд юу болоод өнгөрөв гэдгийг эргэцүүлэн байна. Бусдын л адил энэ онд юу хийх билээ, хэрхэх билээ гэж бодож бясалгаж сууна. Тэгээд энэ удаа төлөвлөлтийн тухай хуваалцъя гэж бодлоо.

САНАА

Төлөвлөх тухайд

Би Кал Ньюпортын фэн л дээ. Жоржтауны их сургуулийн компьютерын шинжлэх ухааны профессор, ажил мэргэжил, бүтээмжийн сэдвээр нэвтэрхий нөхөр. Түүний байнга ярьж бичдэг "Deep work" буюу гүн төвлөрч ажиллах тухай ойлголт бол одоо цагт оюуны хөдөлмөр эрхлэгчдэд тун чухал болоод буй.

Калын сүүлийн нийтлэлээс би нэг алдаагаа олж харлаа. Би өмнөх товшлолдоо өнгөрсөн жил 3 сараар төлөвлөх гэж үзсэн, гэхдээ бүтэлтэй юм болоогүй гэж дурдсан даа. Уг нь халаасны жижиг дэвтэр дээр 7 хоногийн төлөвлөлт хийгээд, харин өдөр өдрийнхөө ажлын жагсаалтыг наадаг шар дээр бичээд, дэвтэр дотроо наагаад явдаг юм. Энэ "3 сар -> 7 хоног -> өдөр бүрийн төлөвлөлт"-ийг Кал хамгийн зөв гэж үздэг юм билээ. Надад ийм сүрхий төлөвлөлтийн талаар сонсоод нэг их итгэж үнэмшдэггүй байсан үе бий. Гэхдээ одоо бодол өөрчлөгдсөн.

Би тухайн улиралд хийх зүйлсээ жагсаадаг ч тэдгээрийг 7, 7 хоногийн төлөвлөлт хийхдээ хардаггүй, тусгадаггүй байсан юм байна. Хааяа л нэг энэ улиралд юу хийнэ гэлээ гэж харна уу гэхээс. Тэгэхээр нухацтай төлөвлөгөө болохгүй нь ойлгомжтой байж. Мөн улирал бүрд хэтэрхий олон юм жагсаачихсан байгаа юм, эргээд харахаар. Ерөөсөө л төлөвлөлтийн хамгийн чухал нь 7 хоногийн төлөвлөгөө гаргахдаа 3 сарынхаасаа аль ажлаа ахиулах ёстойг харах, өдрийн жагсаалтаа гаргахдаа 7 хоногийнхоосоо аль ажилдаа анхаарах ёстойг харах, уялдуулах аж. Энэ жил тэгэхээр энэ илт алдаагаа засаад, бас цөөн зорилт тавина даа.

Калын өөрийнх.

Энэ тайлбар screenshot арай ойлгомжтой харагдах байх

Калын хувьд ажил төлөвлөлт, цагийн менежментийн "time-blocking" буюу цаг бүхэлчилдэг аргатай. Энэ нь тухайн өдөр хийх ажлуудаа 30 минутын нарийвчлалтай урьдчилан зоох арга бөгөөд түүний хэлж байгаагаар гараас гаргах ажлыг хоёр дахин нэмдэг аж. Хялбар тайлбарлах үүднээс дээр зураг хавсаргав. Өөрөө энд бас ойлгомжтой тайлбарлаж. Ингэж ажлуудаа цагтай нь урьдчилж зоосноор төвлөрч ажиллах боломжтой гэж үздэг. Өндөр төвлөрөл шаардахгүй механик ажлуудаа нэгтгэж нэг дор хийх хэрэгтэй гэдэг. Ингэж бүдүүвчилсэн төлөвлөлтийн зарим хэсэг нь өөрчлөгдвөл (зурагт харагдах) тэр баруун талын баганадаа дахиад шинэчилж зурах учиртай гэнэ.

Энэ үнэхээр сайн арга мөн хэдий ч ачир дээрээ, хэрэгжүүлэх шатандаа хүн өөрөө хэр сахилга баттай байх вэ гэдгээс их зүйл шалтгаалах нь ойлгомжтой. Саяхан мань эр энэ аргаар ажлаа төлөвлөх дэвтэр гаргасан байна. Авч туршъя гэвч хөл хориотой үед мөдгүй биз. Гэхдээ зарчмаа л мэдэж байвал энгийн дэвтэр дээр зураад хийчихэд асуудалгүй. Ташрамд дурдахад, нөхрийн "Deep Work" номыг "Гүн үйл" нэрээр орчуулсан байна лээ. Номын нэрийн орчуулга оновчгүй санагдсан, доторх агуулгыг нь харин дажгүй хөрвүүлсэн байгаасай. Мөн сүүлийн үед Кал "Deep Questions" гэсэн подкаст хийгээд байгаа юм байна.

Ямартай ч энэ жил төлөвлөлтөө сайжруулах чин хүсэл байна. Өнгөрсөн жилүүдэд бас янз бүрээр л оролдож туршиж ирсэн, юун дээр алддагаа гадарлахтайгаа болж. Жэймс Клирийн хэлсэнчлэн "Аливаа дадлыг буй болгосны дараа л сайжруулах боломжтой" хойно, болох биз дээ. Хэчнээн тааруу ч бай, өөриймшүүлэхийг хүсэж буй дадлынхаа суурийг тавихгүй бол, бий болгохгүй бол сайжруулна гэж юу байх вэ.

ДАЖГҮЙ

Календарь ашиглалтаа сайжруулах санаатай New Tab Redirect гэх энэ Chrome extension-ийг татсан маань их таалагдлаа. Энэ нэмэлт болбоос броузер дээр шинэ таб нээхэд хүссэн URL-ийг чинь шууд нээж өгнө. Энийг суулгаад Google Calendar-аа дууддаг болгочихсон. Календарь гэлтгүй байнга харахыг, өөртөө сануулахыг хүсдэг вэб хуудсаа дуудвал тун дажгүй юм байна.

БУУХИА

Unread: "Элон Маск" номын тухай
Элон Маскийн хөрөнгийн үнэлгээ Жефф Безосынхыг давж, дэлхийн хамгийн баян хүн болсон тухай мэдээнүүд цуварч байна. Тэгэхээр энэ номыг уншиж амжаагүй бол авч уншаарай гэж хэлэх цаг мөн биз ээ. Бас л "маягтай" ном шүү дээ.

5 Lessons Most People Learn Way Too Late in Life (via Tuvshin)
Ихэнх хүний хэзээ хойно ойлгодог зүйлс.

Career advice: Some truth you probably don't want to hear (Цуврал жиргээ)
Зарим санаанууд нь таалагдлаа. Жишээ нь ажил мэргэжлийн талбарт "хүсэл эрмэлзлээ л дага" гэж их зөвлөдөг шүү дээ. Энэ нь тийм ч сайн зөвлөгөө биш болох тухай дараа бичнэ ээ.